Forskingsdagane 2026

25.-27. september arrangerte me årets Forskingsdagar på ViteMeir.

Tillit på programmet

Årets tema for Forskingsdagane var “tillit” og me hadde eit program med innhald som gjekk under dette temaet, både for elevar og for fritidsgjester.

Fredag starta me med å formidle temaet “Tillit”, til 125 elevar og lærarar. I tillegg til læringsopplegget “strikk-hopp med Barbie” hadde me besøk av både politiet og NAV. Politiet holdt eit innlegg om “Tillit, grenser og ansvar”, medan NAV økonomiteneste formidla om “Tillit i kroner og øre”. Dagen var retta mot elevar i 8., 9. og 10. klasse og tilbakemeldingar frå lærarar vitnar om eit godt og lærerikt program.

Fredag blei programmet for fritidsgjester kickstarta med Quiz i SmakeMeir, og temaet for spørsmåla var sjølvsagt også her “Tillit”.

Både laurdag og søndag hadde me ei forskingsløype i utstillinga som ga deltakaren ulike oppdrag. Til dømes uttesting av hypoteser, strikk-hopp med Barbie, KI-bilete, knutestasjon og skattejakt. Laurdag hadde me besøk av Indre Sogn og Voss sopp- og nyttevekstforening som tilbydde gratis grunnkurs i soppkunnskap til gjestane våre. Der fekk deltakarane lære meir om sanking og bruk av sopp til mat, eit tema som i stor grad baserer seg på tillit— spesielt om ein får det servert.

Søndag hadde restaurant og mat-fag ved Sogndal vgs eit eige opplegg med overskrifter som “Kan du stole på nasen din?” og “Kan du stole på oppskrifta”. Lærerikt og matnyttig for både store og små.

Forskartorg

På laurdag, i tillegg til programmet på huset, stilte me på Forskartorg saman med HVL og Vestlandsforsking i Sentrumsparken. Dette er ein del av Forskingsdagane der ulike aktørar samlast og viser kva ein driv med. ViteMeir stilte med eksperimentstasjon for born, der dei fekk sjå omtrent korleis vanlege forskarar jobbar. Dei fekk kome med ein hypotese, teste det og til slutt få svar. Responsen frå deltakarane var veldig god, og det er kjekt at me får reise ut av bygget innimellom slik at me får møtt enda fleire.

Godt besøk

Det var mange som nytta sjansen til å besøke ViteMeir denne helga. Gratis inngang, godt program og dårleg vær utgjorde til saman ein svært god grunn til å ta turen til Kaupanger, og nesten 400 gjester var innom senteret. I tillegg møtte me rundt 300 personar på årets Forskartorg. Det samla besøkstalet denne helga er, i mangel på eit bedre ord, kjempemessig, og det gjer oss så glade å tenkja på at me har fått formidla kunnskap til over 800 personar i løpet av tre dagar.

Tusen takk til

Forskingsdagane er eit årleg, nasjonalt arrangement og det er sjølvsagt viktig for ViteMeir som regionalt vitensenter å delta og markere desse dagane. Dette er ein god muligheit for oss til å formidle kunnskap ut til gjestane våre gjennom eit overordna tema. Me set derfor stor pris på at me fleire år på rad har fått muligheit til å tilby gratis inngang til alle akkurat denne helga, og dette er takka vere bankane i området rundt oss. Tusen takk til Luster Sparebank, Sogn Sparebank, Sparebanken Norge og Sparebank1 Sogn og Fjordane.

Me må også rekke ein takk til alle som bidrog til at innhald og program blei så godt som det var, tusen takk. Og ikkje minst til alle som besøkte oss og som tok turen innom Forskingstorget.

Me ser allereie fram mot neste års Forskingsdagar!